national
വിവാഹപ്രായം: ഏകീകൃത സിവില്‍ കോഡിലേക്കുള്ള മുന്നൊരുക്കമെന്ന് ലീഗ്; തിടുക്കപ്പെട്ടെന്ന് കോണ്‍ഗ്രസ്
തിടുക്കപ്പെട്ട് സര്‍ക്കാര്‍ ബില്‍ കൊണ്ടുവന്ന രീതിയെ എതിര്‍ക്കുന്നു. എന്നായിരുന്നു തൃണമൂല്‍ കോണ്‍ഗ്രസ് ഉയര്‍ത്തിയ വിമര്‍ശനം. ബില്ലുമായി ബന്ധപ്പെട്ട് സമഗ്രമായ ചര്‍ച്ച ആവശ്യമാണ്. ന്യൂനപക്ഷ വിഭാഗങ്ങള്‍ക്കിടയില്‍ ബില്ലിനെതിരായ നിലപാടാണ് എന്നും ടിഎംസി എംപി സൗഗത റോയ് ചൂണ്ടിക്കാട്ടി. ഏകീകൃത സിവില്‍ കോഡിലേക്കുള്ള മുന്നൊരുക്കമാണെന്നായിരുന്നു മുസ്ലീം ലീഗ് ഉയര്‍ത്തിയ വിമര്‍ശനം. നടപടി വിചിത്രമാണെന്നും മുസ്ലീം ലീഗ് എംപി ഇടി മുഹമ്മദ് ബഷീര്‍ കുറ്റപ്പെടുത്തി. സര്‍ക്കാര്‍ നിയമം ഒളിച്ച് കടത്താന്‍ ശ്രമിച്ചു എന്നും അദ്ദേഹം കുറ്റപ്പെടുത്തി.
ഭരണഘടന അനുശ്വാസിക്കുന്ന മൗലികാവകാശങ്ങളുടെ ലംഘനമാണ് ബില്ലെന്നായിരുന്നു എഐഎംഐഎം നേതാവ് അസദുദ്ദീന്‍ ഒവൈസിയുടെ പ്രതികരണം. വിവാഹപ്രായം ഉയര്‍ത്താനുള്ള നീക്കത്തെ പിന്തിരിപ്പന്‍ ഭേദഗതി എന്നും അദ്ദേഹം വിമര്‍ശിച്ചു. 18 വയസ്സുള്ള ഒരാള്‍ക്ക് ഇന്ത്യയിലെ പ്രധാനമന്ത്രിയെ തിരഞ്ഞെടുക്കാന്‍ അവകാശമുണ്ട്, ലിവ് ഇന്‍ ബന്ധം പുലര്‍ത്താം, എന്നാല്‍ നിങ്ങള്‍ ചെയ്യുന്നത് വിവാഹം ചെയ്യുന്നതിനുള്ള അവകാശം നിഷേധിക്കുകയാണ്. 18 വയസ്സുള്ള കുട്ടിക്ക് വേണ്ടി നിങ്ങള്‍ എന്താണ് ചെയ്തതെന്ന് ചോദിച്ച അദ്ദേഹം ഇന്ത്യയിലെ തൊഴില്‍ മേഖലയിലെ സ്ത്രീ പങ്കാളിത്തം സൊമാലിയയേക്കാള്‍ കുറവാണ് എന്നും ചൂണ്ടിക്കാട്ടി.
വനിതാ ശിശുക്ഷേമ മന്ത്രി സ്മൃതി ഇറാനിയാണ് സ്ത്രീകളുടെ വിവാഹപ്രായം 21 വയസ്സാക്കിക്കൊണ്ടുള്ള ബില്‍ പാര്‍ലമെന്റില്‍ അവതരിപ്പിച്ചത്. രാജ്യത്ത് നിലവിലുള്ള ഏഴ് വിവാഹ നിയമങ്ങള്‍ക്കും ബാധകമാകുന്ന തരത്തിലാണ് ബാല വിവാഹ (ഭേദഗതി) നിയമം 2021 മന്ത്രി ലോക് സഭയില്‍ അവതിപ്പിച്ചത്. നിയമത്തിന് എതിരെ പ്രതിപക്ഷം സമാനതകളില്‍ ഇല്ലാത്ത പ്രതിഷേധം തുടരുന്നതിനിടെ ആയിരുന്നു ബില്‍ അവതരണം. പ്രതിപക്ഷ അംഗങ്ങള്‍ ബില്ലിന്റെ പകര്‍പ്പ് വലിച്ചുകീറി പ്രതിഷേധിച്ചു. പ്രതിപക്ഷ ആവശ്യത്തിന് പിന്നാലെ വിവാഹ പ്രായം ഉയര്‍ത്താനുള്ള ബില്‍ ലോക്‌സഭ സ്റ്റാന്‍ഡിങ് കമ്മിറ്റിക്ക് വിട്ടു. ഇതോടെ പാര്‍ലമെന്റിന്റെ ശീതകാല സമ്മേളനത്തില്‍ പാസാവില്ലെന്ന് ഉറപ്പായി. നാടകീയമായിട്ടായിരുന്നു ബില്‍ ഇന്ന് ലോക്‌സഭയിലെത്തിയത്.
എല്ലാ സമുദായങ്ങള്‍ക്കും നിയമം ബാധകമായിരിക്കും എന്ന് വ്യക്തമാക്കുന്നതാണ് ബില്‍. ഹിന്ദു, ക്രിസ്ത്യന്‍, പാഴ്‌സി വിവാഹ നിയമങ്ങള്‍ മാറ്റും. മുസ്ലീം വ്യക്തി നിയമത്തിനും മുകളിലാണ് പുതിയ വിവാഹ നിയമം. നിയമത്തില്‍ ഇക്കാര്യം പ്രത്യേകം എഴുത്തി ചേര്‍ക്കുമെന്നും ബില്‍ വ്യക്തമാക്കുന്നു.
