പ്രീ വെഡ്ഡിങ്​ ഷൂട്ടിങ്ങിനിടെ ​ഡാം തുറന്നു; പ്രതിശ്രുത വധൂവരൻമാൻ പാറയിൽ കുടുങ്ങി

ന്യൂഡൽഹി: മൂന്നുമണിക്കൂർ നീണ്ട രക്ഷാപ്രവർത്തനത്തിലൂടെ വെള്ളച്ചാട്ടത്തിന്​ സമീപം കുടുങ്ങിയ പ്രതിശ്രുത വധൂവരൻമാരെ രക്ഷ​െപ്പടുത്തി. ഇവർക്കൊപ്പം മറ്റു രണ്ടുപേരും ​പാറയിൽ കുടുങ്ങിയിരുന്നു. രാജസ്​ഥാനിലാണ്​ സംഭവം.

ചിത്തോർഗഡിലെ ചുലിയ വെള്ളച്ചാട്ടത്തിന്​ സമീപമായിരുന്നു ​േഫാ​ട്ടോഷൂട്ട്​. ഫോ​ട്ടോഷൂട്ട്​ തുടങ്ങി നിമിഷങ്ങൾക്കകം അധികാരികൾ ജലനിരപ്പ്​ ഉയരുമെന്ന്​ മുന്നറിയിപ്പ്​ നൽകുകയായിരുന്നു. മുന്നറിയിപ്പിനെ തുടർന്ന്​ ഫോ​ട്ടോഗ്രാഫർ പാറയുടെ മുകളിൽനിന്ന്​ മാറിയെങ്കിലും അ​ദ്ദേഹത്തിന്‍റെ കാമറ വെള്ളത്തിൽ നഷ്​ടമായി.

ചൊവ്വാഴ്ച രാവിലെയാണ്​ റാണ പ്രതാപ്​ സാഗർ ഡാമിന്‍റെ ഷട്ടറുകൾ തുറന്നതെന്ന്​ എസ്​.എച്ച്​.ഒ രാജാറാം ഗുർജാർ പറഞ്ഞു. അതിന്‍റെ ഫലമായി ചുലിയ വെള്ളച്ചാട്ടത്തിൽ വെള്ളം ഉയർന്നു. അതേസമയം 29കാരനായ ആശിഷ്​ ഗുപ്​തയും 27കാരിയായ ശിഖയും പ്രീ വെഡ്ഡിങ്​ ഷൂട്ടിനായി പാറയുടെ മുകളിലായിരുന്നു. സുഹൃത്തുക്കളായ ഹിമാൻഷുവും മിലാനും ഇവർക്കൊപ്പമുണ്ടായിരുന്നു. നിമിഷങ്ങൾക്കകം ഇവർ നിന്നിരുന്ന പാറയുടെ സമീപം വെള്ളം ഉയരുകയായിരുന്നു.

ഇവർക്ക്​ പാറയിൽനിന്ന്​ കരയിലേക്ക്​ വരാൻ സാധിച്ചില്ല. തുടർന്ന്​ ​പൊലീസും സുരക്ഷ സേനയും മൂന്നുമണിക്കൂർ നീണ്ട രക്ഷാപ്രവർത്തനത്തിനുശേഷം ഇവരെ കരക്കെത്തിക്കുകയായിരുന്നു.