national
'ഭാരത് ജോഡോ യാത്രയുടെ സ്വീകാര്യതയെ ബിജെപി ഭയക്കുന്നു'; മുടക്കാന്‍ കൊവിഡിനെ ആയുധമാക്കുന്നുവെന്ന് രാഹുല്‍ ഗാന്ധി
അവര്‍ പുതിയ പദ്ധതിയുമായി വന്നിരിക്കുകയാണ്. കൊവിഡ് വരുന്നുണ്ടെന്നും യാത്ര അവസാനിപ്പിക്കണമെന്നും ആവശ്യപ്പെട്ട് അവര്‍ എനിക്ക് കത്തയച്ചിരിക്കുകയാണ്. മാസ്‌ക് ധരിക്കുക, കൊവിഡ് വ്യാപിക്കുന്നു. ഇതെല്ലാം ഈ യാത്ര നിര്‍ത്താനുള്ള ന്യായങ്ങളാണ്. അവര്‍ രാജ്യത്തിന്റെ ശക്തിയിലും സത്യത്തിലും ഭയപ്പെട്ടിരിക്കുകയാണ്. ഇതാണ് സത്യമെന്ന് രാഹുല്‍ ഗാന്ധി ബീഹാറില്‍ റാലിയെ അഭിസംബോധന ചെയ്ത് സംസാരിക്കവേ പറഞ്ഞു.
കൊവിഡ് പടര്‍ന്ന് പിടിക്കുന്ന സാഹചര്യത്തില്‍ മാനദണ്ഡങ്ങള്‍ പാലിച്ച് ഭാരത് ജോഡോ യാത്ര നടത്തണമെന്നും അല്ലെങ്കില്‍ നിര്‍ത്തിവെക്കണമെന്നും കേന്ദ്ര ആരോഗ്യ മന്ത്രി മന്‍സൂഖ് മാണ്ഡവ്യ രാഹുല്‍ ഗാന്ധിക്കും രാജസ്ഥാന്‍ മുഖ്യമന്ത്രി അശോക് ഗെഹ്‌ലോട്ടിനും കത്ത് നല്‍കിയിരുന്നു. എന്നാല്‍ യാത്രയില്‍ മാറ്റം വരുത്താന്‍ കോണ്‍ഗ്രസ് തയ്യാറായിട്ടില്ല. ഹരിയാനയില്‍ പര്യടനം നടത്തുന്ന യാത്രയില്‍ സാധാരണ പോലെ വന്‍ ജനങ്ങളാണ് പങ്കെടുക്കുന്നത്.
കൊവിഡ് നിയന്ത്രണങ്ങളില്‍ സംസ്ഥാനങ്ങള്‍ക്ക് സ്വയം തീരുമാനമെടുക്കാമെന്ന് കേന്ദ്രം വ്യക്തമാക്കിയിട്ടുണ്ട്. അത് കൊണ്ട് തന്നെ യാത്ര പ്രവേശിക്കാനിരിക്കുന്ന ബിജെപി സംസ്ഥാനങ്ങള്‍ എന്ത് തരം നിയന്ത്രണങ്ങളാണ് നടപ്പാക്കുന്നതെന്ന് കണ്ടറിയണം.
