kerala
ദുരിതാശ്വാസ നിധിയിലേക്ക് ലഭിച്ചത് 53 കോടിയിലധികം; ‘മുഴുവന് തുകയും വയനാടിന്’ Wayanad cm disaster relief fund
ദുരന്തത്തിന്റെ പശ്ചാത്തലത്തില് മുഖ്യമന്ത്രിയുടെ ദുരിതാശ്വാസ നിധിയിലേക്ക് സര്ക്കാര് ജീവനക്കാരും അധ്യാപകരും സംഭാവന നല്കാന് മുന്നോട്ടുവന്നിട്ടുണ്ടെന്ന് അദ്ദേഹം പറഞ്ഞു. ഇത് സംബന്ധിച്ച സര്ക്കാര് അഭ്യര്ത്ഥന പൊതുവേ സ്വീകരിക്കപ്പെട്ടു. സര്ക്കാര് ജീവനക്കാരും പൊതു മേഖലാ സ്ഥാപനങ്ങളിലും എയ്ഡഡ് സ്കൂള് കോളേജുകളിലും ജോലി ചെയ്യുന്നവരും ഇതില് പങ്കാളികളാവുകയാണെന്നും മുഖ്യമന്ത്രി പറഞ്ഞു. വരുന്ന ഓരോ തുകയും വയനാടിന്റെ ദുരിതാശ്വാസ പ്രവര്ത്തനങ്ങള്ക്കായി ഉപയോഗിക്കും
സംഘടനാ ഫെഡറേഷനുകളുടെ നേതൃത്വവുമായി നേരിട്ട് ആശയവിനിമയം നടത്തിയിരുന്നു. അതനുസരിച്ച് കുറഞ്ഞത് അഞ്ച് ദിവസത്തെ വേതനമെങ്കിലും സംഭാവനയായി നല്കും എന്നാണ് പൊതുവിൽ ധാരണ. അതില് കൂടുതല് നല്കാന് ആഗ്രഹിക്കുന്നവര്ക്ക് അങ്ങനെ നല്കാം. അഞ്ചു ദിവസത്തെ ശമ്പളം ഒറ്റത്തവണയായി അടുത്തമാസത്തെ ശമ്പളത്തില് നല്കാന് കഴിയുന്നവര്ക്ക് അങ്ങനെയാകാം. തവണകളായി സംഭാവന നല്കാന് ആഗ്രഹിക്കുന്നവര്ക്ക് അടുത്തമാസം ഒരു ദിവസത്തെയും തുടര്ന്നുള്ള രണ്ടു മാസങ്ങളില് രണ്ടു ദിവസത്തെ വീതവും ശമ്പളം നല്കി പങ്കാളികളാകാം. സന്നദ്ധത കാണിച്ച് സ്ഥാപനമേധാവികള്ക്കാണ് സമ്മതപത്രം നല്കേണ്ടത്. സ്പാര്ക്ക് മുഖേന തുടര് നടപടികള് സ്വീകരിക്കുമെന്നും മുഖ്യമന്ത്രി വാര്ത്തസമ്മേളനത്തില് വ്യക്തമാക്കി.
സര്ക്കാരിന്റെ നിര്ബന്ധമല്ല, ജീവകാരുണ്യവും മനുഷ്യത്വവും സ്ഫുരിക്കുന്ന മനസ്സാണ് ഇത്തരമൊരു തീരുമാനത്തിലേക്ക് നയിച്ചതെന്നും, സഹായം നല്കാന് മുന്നോട്ടു വരുന്ന എല്ലാവരെയും അഭിവാദ്യം ചെയ്യുന്നുവെന്നും മുഖ്യമന്ത്രി പറഞ്ഞു.
