ന്യൂഡൽഹി: ഇന്ത്യയുടെ പുതിയ പാർലിമെന്റ് മന്ദിരം പ്രധാനമന്ത്രി നരേന്ദ്ര മോദി മെയ് 28ന് രാജ്യത്തിന് സമർപ്പിക്കുകയാണ്. 1927-ൽ നിർമാണം പൂർത്തിയാക്കിയ നിലവിലെ പാർലിമെന്റ് മന്ദിരം സർക്കാരിന്റെ ഇന്നത്തെ ആവശ്യങ്ങൾ നിറവേറ്റാൻ അപര്യാപ്തമാണെന്ന് കണ്ടെത്തിയതിന്റെ അടിസ്ഥാനത്തിലാണ് പുതിയ പാർലിമെന്റ് മന്ദിരം പണിയാൻ ലോക്സഭയും രാജ്യസഭയും പ്രമേയം പാസാക്കിയത്. നടപടിക്രമങ്ങൾക്ക് ശേഷം, 2020 ഡിസംബർ 10 ന് പ്രധാനമന്ത്രി മോദി പുതിയ കെട്ടിടത്തിന്റെ തറക്കല്ലിട്ടു.
പഴയ കെട്ടിടത്തിൽ ലോക്സഭയിൽ 543 അംഗങ്ങൾക്കും രാജ്യസഭയിൽ 250 അംഗങ്ങൾക്കുമാണ് ഇരിക്കാൻ സാധിച്ചിരുന്നതെങ്കിൽ പുതിയ പാർലിമെന്റിൽ ലോക്സഭയിൽ 888 അംഗങ്ങൾക്കും രാജ്യസഭയിൽ 384 അംഗങ്ങൾക്കും ഇടം ലഭിക്കും.
പുതിയ മന്ദിരത്തെക്കുറിച്ച് അറിയേണ്ട പ്രധാന കാര്യങ്ങൾ:
64,500 ചതുരശ്ര മീറ്റർ വിസ്തൃതിയിലാണ് കെട്ടിടം നിർമ്മിച്ചിരിക്കുന്നത്.
സെൻട്രൽ വിസ്ത പദ്ധതിയിൽ ഉൾപ്പെട്ടതാണ് ത്രികോണാകൃതിയിലുള്ള പുതിയ പാർലമെന്റ് മന്ദിരം. ലോക്സഭ, രാജ്യസഭ, സെൻട്രൽ ലോഞ്ച്, ഭരണഘടനാ അധികാരികളുടെ ഓഫീസുകൾ എന്നിവയാ പുതിയ കെട്ടിടത്തിൽ ഉണ്ടാവുക.
ഇന്ത്യയുടെ ദേശീയ പക്ഷിയായ മയിലിൽ നിന്ന് പ്രചോദനമുൾക്കൊണ്ടാണ് പുതിയ ലോക്സഭാ ചേംബർ രൂപകൽപ്പന ചെയ്തിരിക്കുന്നത്. പുതിയ രാജ്യസഭാ ചേംബറാകട്ടെ ദേശീയ പുഷ്പമായ താമരയോട് സാമ്യമുള്ളതാണ്.
പുതിയ മന്ദിരം രാഷ്ട്രപതി ഭവൻ പോലുള്ള ഇന്ത്യയിലെ പ്രധാനപ്പെട്ട പൈതൃക കെട്ടിടങ്ങളിൽ നിന്നുള്ള വിവിധ വാസ്തുവിദ്യാ സ്വാധീനങ്ങളെ പ്രതിഫലിപ്പിക്കുന്നതായി സർക്കാരിന്റെ ഔദ്യോഗിക രേഖയിൽ പറയുന്നു.
പഴയ കെട്ടിടം തുടർന്നും ഉപയോഗിക്കും. രണ്ട് കെട്ടിടങ്ങളും പരസ്പരം പൂരകമാക്കുക എന്നതാണ് അടിസ്ഥാന വാസ്തുവിദ്യാ തന്ത്രം. സർക്കാരിന്റെ പ്രഖ്യാപിത പദ്ധതി പ്രകാരം, പഴയ കെട്ടിടത്തിന്റെ ചരിത്രപരമായ പൈതൃകം നിലനിർത്താൻ പൂർണ ശ്രദ്ധ ചെലുത്തും.
പുതിയ കെട്ടിടം നിർമ്മിച്ചതിന് ശേഷം യഥാർത്ഥ പാർലമെന്റ് മന്ദിരത്തിന്റെ ദൃശ്യപരതയ്ക്ക് മാറ്റമില്ലെന്ന് ഉറപ്പാക്കാനുള്ള ശ്രമങ്ങൾ തുടരുകയാണ്. പാർലമെന്റ് കോംപ്ലക്സിൽ സ്ഥിതി ചെയ്യുന്ന എല്ലാ പ്രതിമകളും പുനഃസ്ഥാപിക്കും.
പുതിയ കെട്ടിടത്തിൽ ആറ് കമ്മിറ്റി മുറികളാണുള്ളത്. നിലവിലെ കെട്ടിടത്തിൽ അത്തരം മൂന്ന് മുറികളുണ്ട്.
മന്ത്രിസഭയുടെ ഉപയോഗത്തിനായി 92 മുറികളുണ്ടാകും.
പുതിയ കെട്ടിടത്തിൽ, ലോക്സഭയിലെയും രാജ്യസഭയിലെയും ഓരോ ബെഞ്ചിലും രണ്ട് അംഗങ്ങൾക്ക് വീതം ഇരിക്കാം. ഓരോ സീറ്റിലും ഡിജിറ്റൽ സംവിധാനങ്ങളും ടച്ച് സ്ക്രീനുകളും സജ്ജീകരിക്കും.
ഇരുസഭകളിലെയും അംഗങ്ങൾക്ക് യോഗം ചേരുന്നതിനായി ഒരു സെൻട്രൽ കോർട്ട് യാഡ് ഉണ്ടാകും.
ഉയർന്ന നിലവാരത്തിലുള്ള സുരക്ഷാ മാനദണ്ഡങ്ങൾ പാലിച്ചാണ് പുതിയ മന്ദിരം രൂപകൽപ്പന ചെയ്തിരിക്കുന്നത്.
ഇന്ത്യയുടെ ജനാധിപത്യ പൈതൃകം പ്രദർശിപ്പിക്കുന്നതിനായി പുതിയ കെട്ടിടത്തിൽ ഒരു ഭരണഘടനാ ഹാൾ ഉണ്ടായിരിക്കും. ഒരു ലൈബ്രറി, ഒരു ഡൈനിംഗ് റൂം, അംഗങ്ങൾക്ക് വിശാലമായ പാർക്കിംഗ് എന്നിവയും വരാനിരിക്കുന്ന മറ്റ് ഘടനകളിൽ ഉൾപ്പെടുന്നു.
പുതിയ കെട്ടിടത്തിൽ മഴവെള്ള സംഭരണവും ജല പുനരുപയോഗ സംവിധാനവും ഉണ്ടാകും. കെട്ടിടത്തിലുടനീളം 100% യുപിഎസ് പവർ ബാക്കപ്പ് നൽകുമെന്ന് രേഖ പറയുന്നു.
അഹമ്മദാബാദ് ആസ്ഥാനമായുള്ള എച്ച്സിപി ഡിസൈൻ ആൻഡ് മാനേജ്മെന്റ് പ്രൈവറ്റ് ലിമിറ്റഡാണ് പുതിയ കെട്ടിടത്തിന്റെ രൂപകൽപന ചെയ്തത്. കേന്ദ്രത്തിന്റെ സെൻട്രൽ വിസ്ത പുനർവികസന പദ്ധതികളുടെ ഭാഗമായ പുതിയ പാർലമെന്റ് മന്ദിരം നിർമ്മിക്കുന്നതിനുള്ള കരാർ ടാറ്റ പ്രോജക്ട്സ് നേടി.
സൻസദ് ഭവൻ (പാർലമെന്റ് ഹൗസ്), റിസപ്ഷൻ ഓഫീസ് ബിൽഡിംഗ്, സൻസദിയ സൗധ (പാർലമെന്റ് ഹൗസ് അനെക്സ്), പാർലമെന്റ് ഹൗസ് അനക്സിലേക്കുള്ള വിപുലീകരണം, സൻസദിയ ജ്ഞാനപീഠം (പാർലമെന്റ് ലൈബ്രറി കെട്ടിടം) എന്നിവ ഉൾക്കൊള്ളുന്നതാണ് നിലവിലെ പാർലമെന്റ്.
