kerala
പഞ്ചായത്ത് ഓഫീസിന് മുന്നില് യുവാവ് തീകൊളുത്തിയ യുവതി മരിച്ചു; യുവാവ് ഗുരുതരാവസ്ഥയില്
ഓഫീസ് പരിസരത്ത് കാത്ത് നില്ക്കുകയായിരുന്ന യുവാവ് യുവതിയുടെ ശരീരത്തിലേക്ക് പെട്രോള് ഒഴിക്കുകയായിരുന്നു. ഇതിനുപിന്നാലെ സ്വന്തം ശരീരത്തിലും പെട്രോള് ഒഴിച്ച് യുവാവ് തീകൊളുത്തി. തിക്കോടി പള്ളിത്താഴം സ്വദേശിയും കൃഷ്ണപ്രിയയുടെ അയല്വാസിയുമായ നന്ദകുമാർ എന്ന യുവാവാണ് ആക്രമണം നടത്തിയതെന്നാണ് വിവരം.
യുവതിയുടെ നിലവിളി കേട്ട് എത്തിയ നാട്ടുകാരാണ് ഗുരുതര പൊള്ളലേറ്റ ഇരുവരെയും കൊയിലാണ്ടി ആശുപത്രിയില് പ്രവേശിപ്പിച്ചത്. പിന്നീട് കോഴിക്കോട് മെഡിക്കല് കോളേജിലേക്ക് മാറ്റിയ യുവതി ചികിത്സയിലിരിക്കെ അഞ്ചുമണിയോടെ മരണപ്പെടുകയായിരുന്നു. 70 ശതമാനത്തിലധികം പൊള്ളലേറ്റ യുവാവ് മെഡിക്കല് കോളേജ് ആശുപത്രിയില് ചികിത്സയിലാണ്. അതേസമയം, തീകൊളുത്തുന്നതിന് മുമ്പ് പ്രതി തന്നെ കുത്തിപരിക്കേല്പ്പിച്ചതായി മരണത്തിന് മുന്പ് യുവതി മൊഴി നല്കി.
ആശുപത്രി അധികൃതരോടാണ് യുവതി ഇക്കാര്യം പറഞ്ഞത്.സംഭവത്തില് പയ്യോളി പൊലീസ് അന്വേഷണം ആരംഭിച്ചിട്ടുണ്ട്. ആക്രമണത്തിന് പിന്നിലെ പ്രകോപനം എന്താണെന്ന് വ്യക്തമല്ലെങ്കിലും പ്രാഥമിക അന്വേഷണത്തില് പ്രണയ പകയാണ് പിന്നിലെന്നാണ് സൂചന. പെണ്കുട്ടിയെ യുവാവ് നിരന്തരം ശല്യം ചെയ്തിരുന്നു. പെണ്കുട്ടിയുടെ ഫോണ് യുവാവിന്റെ കസ്റ്റഡിയിലായിരുന്നുവെന്നാണ് സൂചന. മൂന്ന് ദിവസം മുന്പാണ് കൃഷ്ണപ്രിയ തിക്കോടി പഞ്ചായത്ത് ഓഫീസില് ജോലിയില് പ്രവേശിച്ചത്.
