kerala
'മറ്റേതോ രാസവസ്തു വെള്ളം ചേര്ത്ത് കുടിച്ചു'; ഇരിങ്ങാലക്കുടയില് മരിച്ചവര് കഴിച്ചത് വ്യാജ മദ്യമല്ലെന്ന് പൊലീസ്
വ്യാജമദ്യം കഴിച്ചെന്ന പ്രചാരണത്തിന് പിന്നാലെ ഇവര് മദ്യപിച്ചിരുന്ന ചിക്കന് സെന്ററില് പൊലീസ് പരിശോധന നടത്തി തെളിവുകള് ശേഖരിച്ചു. തൃശ്ശൂര് റൂറല് എസ്.പിയുടെ നേതൃത്വത്തിലുള്ള ഉന്നത പോലീസ് സംഘമാണ് ചിക്കന് സെന്റില് പരിശോധന നടത്തി തെളിവുകള് ശേഖരിച്ചു. പിന്നാലെയാണ് ഇവര് കഴിച്ചത് വ്യാജമദ്യമല്ലെന്നും മദ്യത്തിന് പകരം മറ്റേതോ രാസവസ്തു വെള്ളം ചേര്ത്ത് കഴിച്ചതാകാം മരണകാരണമെന്നാണ് പോലീസിന്റെ പ്രാഥമിക നിഗമനം. കൂടുതല് വിവരങ്ങള് ലാബിലെ പരിശോധനക്കു ശേഷമേ വ്യക്തമാക്കാന് സാധിക്കുകയുള്ളൂവെന്നും പോലീസ് പറഞ്ഞു.
നിശാന്തിനും ബിജുവിനും മദ്യം എവിടെ നിന്നുമാണ് ലഭിച്ചത് എന്നതിനെക്കുറിച്ചും അന്വേഷണം ആരംഭിച്ചു. ഇവര് കഴിച്ചിരുന്ന മദ്യത്തിന്റെ ബാക്കിയും രണ്ടു ഗ്ലാസും വിദഗ്ദ പരിശോധനക്കായി പൊലീസ് ശേഖരിച്ചിട്ടുണ്ടെന്ന് തൃശ്ശൂര് റൂറല് എസ് ജി പൂങ്കുഴലി പ്രതികരിച്ചു. ഇന്നലെ രാത്രി പത്തു മണിയോടെയാണ് സംഭവം. നിശാന്തും ബിജുവും ഒരുമിച്ച് ബസ് സ്റ്റാന്ഡിനു സമീപമുള്ള നിശാന്തിന്റെ കടയില് വച്ചാണ് മദ്യം കഴിച്ചത്. ശേഷം ഇരിങ്ങാലക്കുട ഠാണാ ജംഗ്ഷനിലേക്ക് ബൈക്കില് വരുന്ന വഴി മുന്സിഫ് കോടതിക്കു സമീപത്തുവച്ച് നിശാന്ത് കുഴഞ്ഞു വീഴുകയായിരുന്നു. ഉടന് തന്നെ ഇരുവരെയും ഇരിങ്ങാലക്കുട ജനറല് ആശുപത്രിയില് പ്രവേശിപ്പിച്ചിരുന്നുവെങ്കിലും നിശാന്ത് അവിടെ വെച്ചു തന്നെ മരിക്കുകയായിരുന്നു. ഗുരുതരാവസ്ഥയില് തൃശ്ശൂര് മെഡിക്കല് കോളെജ് ആശുപത്രിയിലേക്ക് മാറ്റിയ ബിജു ഇന്ന് രാവിലെയുമാണ് മരിച്ചത്.
