kerala
കടലില്‍ വലയിട്ടപ്പോള്‍ കുടുങ്ങിയത് പോത്ത്; ദുഷ്‌കര രക്ഷാപ്രവര്‍ത്തനവുമായി മത്സ്യതൊഴിലാളികള്‍
കരയില്‍ നിന്ന് 2 കിലോമീറ്ററോളം കടലില്‍ ദൂരത്തെത്തി മീന്‍പിടിക്കുന്നതിനായി വല ഇട്ടപ്പോഴാണ് അസാധാരണ ശബ്ദത്തിന് ഒപ്പം പോത്തിനെ ശ്രദ്ധയില്‍ പെട്ടത്. മീന്‍ പിടിക്കുന്നതിന് വലയിട്ടപ്പോള്‍ ഇരുട്ടില്‍ ശബ്ദം കേട്ട് ഭയന്നെങ്കിലും ടോര്‍ച്ചടിച്ച് നോക്കിയപ്പോഴാണ് പോത്തിനെ കാണുന്നത്. ഇതോടെ പോത്തിനെ രക്ഷപ്പെടുത്താനുള്ള ശ്രമം തുടങ്ങി. എന്നാല്‍, ഭയന്ന പോത്ത് അടുത്തില്ല. ഇതോടെ സമീപത്ത് ഉണ്ടായിരുന്ന സല റിസ ഉള്‍പ്പെടെയുള്ള മറ്റ് വള്ളങ്ങളിലുള്ളവരുടെയും സഹായം തേടി.
സല റിസ വള്ളത്തിലെ മുഹമ്മദ് റാഫി വെള്ളത്തിലേക്ക് ചാടി പോത്തിന്റെ കഴുത്തിലെ കയറില്‍ മറ്റൊരു കയര്‍ കെട്ടി പോത്തിനെ വള്ളത്തിലേക്ക് അടുപ്പിക്കുകയായിരുന്നു. പിന്നീട് പോത്തിനെ വള്ളത്തോട് ചേര്‍ത്ത് നിര്‍ത്തി തിരികെ കരയിലേക്കു യാത്ര തിരിച്ചു.
വളരെ സാവധാനത്തില്‍ മാത്രമാണ് സഞ്ചരിക്കാനായത്. വേഗത കൂട്ടുമ്പോള്‍ പോത്ത് വെള്ളത്തിലേക്ക് താഴ്ന്നു പോകുന്ന സ്ഥിതിയായിരുന്നു. രക്ഷാ പ്രവര്‍ത്തനത്തിന് ഇടയില്‍ പോത്തിന്റെ ചവിട്ടടക്കം ഇവര്‍ക്ക് ഏല്‍ക്കേണ്ടിവരികയും ചെയ്തു. കരയിലെത്തിച്ച പോത്തിനെ പിന്നീട് ഇവര്‍ ഉടമക്ക് കൈമാറി.
