kerala
കൂനൂര്‍ ഹെലികോപ്റ്റര്‍ അപകടം; മലയാളി സൈനികന്‍ പ്രദീപിന്റെ സംസ്‌കാരം വൈകീട്ട്, മൃതദേഹം ഉച്ചയോടെ പൊന്നൂക്കരയിലെത്തിക്കും
നാടിന്റെ വീരപുത്രന് വിരോചിതമായി വിട നല്‍കാനുള്ള ക്രമീകരണങ്ങള്‍ ഇതിനോടകം പൂര്‍ത്തിയായി. ഡല്‍ഹിയില്‍ നിന്നും കോയമ്പത്തൂര്‍ സുലൂരിലെ വ്യോമകേന്ദ്രത്തില്‍ ആദ്യം ഭൗതിക ദേഹം എത്തിക്കും. സുലൂര്‍ വ്യോമ കേന്ദ്രത്തില്‍ സഹപ്രവര്‍ത്തകര്‍ക്ക് അന്ത്യാഞ്ജലിയര്‍പ്പിക്കാന്‍ സൗകര്യം ഒരുക്കും. രണ്ട് മണിക്കൂര്‍ നേരമാണ് ഇവിടെ പൊതുദര്‍ശനം നിശ്ചയിച്ചിരിക്കുന്നത്.
തുടര്‍ന്ന് റോഡു മാര്‍ഗമായിരിക്കും തൃശ്ശൂര്‍ പൊന്നൂക്കരയിലെ വസതിയിലെത്തിക്കുക. പിന്നീട് പ്രദീപ് പഠിച്ച പുത്തൂര്‍ ഗവ. സ്‌കൂളില്‍ പൊതു ദര്‍ശനത്തിന് വെക്കും. ശേഷം വൈകീട്ടോടെ വീട്ടു വളപ്പില്‍ സംസ്‌കരിക്കാനാണ് നിലവിലെ തീരുമാനം. പൂര്‍ണ ഔദ്യോഗിക ബഹുമതികളോടെയാകും ചടങ്ങുകള്‍ നടക്കുക. പ്രദീപിന്റെ ഭാര്യ ലക്ഷ്മിയും മക്കളും കഴിഞ്ഞ ദിവസം കോയമ്പത്തൂരില്‍ നിന്നും പൊന്നൂക്കരയിലെ വീട്ടില്‍ എത്തിയിരുന്നു.
രോഗിയായ അച്ഛന്‍ വെന്റിലേറ്ററില്‍ വീട്ടില്‍ തന്നെ ചികിത്സയിലാണ്. അമ്മയെ നേരത്തെ തന്നെ വിവരം അറിയിച്ചിരുന്നു.
അതിനിടെ, മലയാളി സൈനികന്‍ എ. പ്രദീപിന്റെ വീട്ടുകാര്‍ക്ക് സര്‍ക്കാര്‍ സഹായം ഒരുക്കുമെന്ന് മന്ത്രി കെ രാധാകൃഷ്ണന്‍ വ്യക്തമാക്കിയിരുന്നു. പ്രദീപിന്റെ തൃശ്ശൂര്‍ പൊന്നൂക്കരയിലെ വീട് സന്ദര്‍ശിച്ച ്‌ശേഷം ഇന്നലെ രാത്രി മാധ്യമങ്ങളോട് സംസാരിക്കുകയായിരുന്നു മന്ത്രി കെ രാധാകൃഷ്ണന്‍.
