'സിംഹം എന്നും സിംഹം തന്നെയായിരിക്കും'; 'കമലിസ'ത്തിന്റെ 62 വർഷങ്ങൾ

സിനിമയിൽ 62 വർഷം പിന്നിടുകയാണ് ഉലകനായകൻ കമൽഹാസൻ. താരത്തിന് ആശംസകളുമായി രം​ഗത്തെത്തിയിരിക്കുകയാണ് അദ്ദേഹത്തിന്റെ പുതിയ ചിത്രമായ വിക്രമിന്റെ സംവിധായകൻ ലോകേഷ് കനകരാജ്. ചിത്രത്തിലെ കമലിന്റെ പുതിയ പോസ്റ്റർ പങ്കുവച്ചുകൊണ്ടാണ് ലോകേഷ് ആശംസകൾ നേർന്നത്. കമൽഹാസൻ വാളുമായി പുറം തിരിഞ്ഞ് നിൽക്കുന്നതാണ് പോസ്റ്റർ. 'സിംഹം എന്നും സിംഹം തന്നെയായിരിക്കും' എന്ന കുറിപ്പോടെയാണ് പോസ്റ്റർ പങ്കുവച്ചിരിക്കുന്നത്.

കമൽ ഹാസന് പുറമേ ഫഹദ് ഫാസിൽ, വിജയ് സേതുപതി തുടങ്ങിയവരും ചിത്രത്തിൽ പ്രധാന വേഷങ്ങളിലെത്തുന്നുണ്ട്. ഇന്ത്യൻ 2വിന് ശേഷം കമൽ ഹാസൻ പ്രധാന വേഷത്തിലെത്തുന്ന ചിത്രമാണ് വിക്രം. വിജയിനെ നായകനാക്കി ഒരുക്കിയ മാസ്റ്ററിന് ശേഷം ലോകേഷ് സംവിധാനം ചെയ്യുന്ന ചിത്രമാണിത്. നരേൻ, അർജുൻ ദാസ് തുടങ്ങിയവരാണ് ചിത്രത്തിലെ മറ്റു താരങ്ങൾ.

ഗിരീഷ് ഗംഗാധരനാണ് ചിത്രത്തിന്റെ ഛായാഗ്രാഹകൻ.ഒരു ആക്ഷൻ- പൊളിറ്റിക്കൽ ത്രില്ലർ ചിത്രമാണ് വിക്രം. പ്രശസ്ത സ്റ്റണ്ട് കൊറിയോഗ്രാഫേഴ്സായ അൻപറിവാണ് ചിത്രത്തിനായി സംഘട്ടനങ്ങൾ ഒരുക്കുന്നത്. അനിരുദ്ധ് രവിചന്ദർ ആണ് ചിത്രത്തിന് വേണ്ടി സംഗീതം ഒരുക്കുന്നത്.