മാസ്ക് ധരിക്കുന്നത് തുടരണം: കൊവിഡ് പ്രതിരോധം ശക്തമാക്കണമെന്ന് കേന്ദ്രം; ഏത് സാഹചര്യത്തേയും നേരിടാൻ രാജ്യം തയ്യാറാണെന്നും മന്ത്രി

ന്യൂഡൽഹി: ചൈനയുൾപ്പെടെയുളള വിദേശ രാജ്യങ്ങളിലെ കൊവിഡ് വ്യാപനം കണക്കിലെടുത്ത് മുന്നറിയിപ്പുമായി കേന്ദ്രം. പൊതുയിടങ്ങളിൽ മാസ്ക് ധരിക്കുന്നത് തുടരണമെന്ന് കേന്ദ്ര ആരോ​ഗ്യ മന്ത്രി മൻസുഖ് മാണ്ഡവ്യ പറഞ്ഞു. രാജ്യത്ത് കൊവിഡ് പ്രതിരോധം ശക്തമാക്കണം. കൊവിഡ് ഇതുവരെ അവസാനിച്ചിട്ടില്ല. ജാ​ഗ്രത പാലിക്കാനും നിരീക്ഷണം ശക്തമാക്കാനും നിർദേശിച്ചിട്ടുണ്ട്. ഏത് സാഹചര്യത്തേയും നേരിടാൻ രാജ്യം തയ്യാറാണെന്നും മന്ത്രി കൂട്ടിച്ചേർത്തു. ഇന്ന് കേന്ദ്ര ആരോ​ഗ്യ മന്ത്രിയുടെ നേതൃത്വത്തിൽ വിളിച്ചുചേർത്ത യോ​ഗത്തിലാണ് നിർദേശം.

ആൾകൂട്ടങ്ങളുളള ഇടങ്ങളിൽ വീടിന് അകത്തും പുറത്തും മാസ്ക് ധരിക്കുന്നത് തുടരണമെന്ന് യോ​ഗത്തിന് ശേഷം നീതി ആയോ​ഗ് അം​ഗം ഡോ വി കെ പോൾ നിർദേശിച്ചു. മുൻകരുതൽ ഡോസ് സ്വീകരിക്കാൻ വൈകരുത്. ഇതുവരെ രാജ്യത്ത് 27-28 ശതമാനം പേർ മാത്രമാണ് മുൻകരുതൽ ‍ഡോസ് സ്വീകരിച്ചത്. മുതിർന്ന പൗരന്മാർ ഇക്കാര്യത്തിൽ വിട്ടുവീഴ്ച്ച ചെയ്യരുതെന്നും വി കെ പോൾ പറഞ്ഞു.

പുതിയ വകഭേദങ്ങൾ തിരിച്ചറിയുന്നത് സു​ഗമമാക്കുന്നതിനായി കൊവിഡ് പോസിറ്റീവ് കേസുകളുടെ സാമ്പിളുകൾ ഇൻസകോ​ഗ് ലാബുകളിലേക്ക് അയക്കാൻ സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കും നിർദേശം നൽകിയിട്ടുണ്ട്. സീറോ കൊവിഡ് നയം ലഘൂകരിച്ചതിന് ശേഷം ചൈനയിലെ കൊവിഡ് ബാധിതരുടെ എണ്ണം വർധിച്ചതാണ് കേന്ദ്ര ആരോ​ഗ്യമന്ത്രാലയം അടിയന്തര യോ​ഗം വിളിച്ചു ചേർക്കാൻ കാരണമായത്. ചൈനയെ കൂടാതെ ജപ്പാൻ, അമേരിക്ക എന്നിവിടങ്ങളിൽ കൊവിഡ് ബാധിതരുടെ എണ്ണം വർധിച്ചിട്ടുണ്ട്. ആരോ​ഗ്യവിഭാ​ഗം സെക്രട്ടറിമാർ, ഫാർമസ്യൂട്ടിക്കൽസ് ഡിപ്പാർട്മെന്റ്, ബയോടെക്നോളജി ഡിപ്പാർട്മെന്റ്, ആയുഷ്, ഇന്ത്യൻ കൗൺസിൽ ഓഫ് മെഡിക്കൽ റിസർച്ച്, നീതി ആയോ​ഗ് അം​ഗം ഡോ. വി കെ പോൾ തുടങ്ങിയവരാണ് യോ​ഗത്തിൽ പങ്കെടുത്തത്.