വോട്ടെണ്ണല്‍ ദിനത്തില്‍ സംസ്ഥാനത്ത് ലോക്ഡൗണ്‍ വേണ്ടെന്ന് ഹൈക്കോടതി

കൊച്ചി: മേയ് രണ്ട് വോട്ടെണ്ണൽ ദിനത്തിൽ സംസ്ഥാനത്ത് ലോക്ഡൗൺ ഏർപ്പെടുത്തേണ്ട കാര്യമില്ലെന്ന് ഹൈക്കോടതി. വോട്ടെണ്ണൽ ദിവസം സർക്കാരും തിരഞ്ഞെടുപ്പ് കമ്മീഷനും സ്വീകരിച്ച നടപടികൾ പര്യാപ്തമാണെന്നും കോടതി പറഞ്ഞു.

സർക്കാർ ഉത്തരവിന്റെ അടിസ്ഥാനത്തിൽ നിയന്ത്രണങ്ങളും നടപടികളും സ്വീകരിക്കാമെന്നും കോടതി നിർദേശിച്ചു. കോവിഡ് വ്യാപനം രൂക്ഷമായ സാഹചര്യത്തിൽ വോട്ടെണ്ണൽ ദിനം ലോക്ഡൗൺ ഏർപ്പെടുത്തണമെന്ന ഹർജിയിലാണ് കോടതിയുടെ ഉത്തരവ്. ഇതുമായി ബന്ധപ്പെട്ട മൂന്ന് ഹർജികളും ഹൈക്കോടതി തീർപ്പാക്കി

സർവകക്ഷി യോഗത്തിൽ വോട്ടെണ്ണൽ ദിനത്തിലെ നിയന്ത്രണങ്ങൾ സംബന്ധിച്ച് ഉചിതമായ തീരുമാനങ്ങൾ സ്വീകരിച്ചിട്ടുണ്ടെന്നും ലോക്ഡൗൺ വേണ്ടെന്നും സംസ്ഥാന സർക്കാർ കോടതിയെ അറിയിച്ചു. മേയ് രണ്ടിന് ആഹ്ളാദ പ്രകടനങ്ങൾ ഉൾപ്പെടെ വിലക്കിയിട്ടുണ്ടെന്ന് തിരഞ്ഞെടുപ്പ് കമ്മീഷനും കോടതിയെ ധരിപ്പിച്ചു. ഈ വാദങ്ങൾ കേട്ട ശേഷമാണ് ഇരുകൂട്ടരുടെയും നടപടികൾ പര്യാപ്തമാണെന്ന് കോടതി പറഞ്ഞത്.

നിയന്ത്രണങ്ങൾ ലംഘിക്കുന്നവർക്കെതിരേ നടപടി സ്വീകരിക്കാൻ സംസ്ഥാന സർക്കാറിന് സാധിക്കും. ഇതിനായി കോടതി പ്രത്യേകം ഉത്തരവിടേണ്ടതില്ലെന്നും കോടതി വ്യക്തമാക്കി.