kerala
വാഹന പണിമുടക്ക് : നാളത്തെ എസ്.എസ്.എല്‍.സി, പ്ലസ് ടു മോഡല്‍ പരീക്ഷകള്‍ മാറ്റി
വില കുതിച്ചുയരുന്നതില്‍ പ്രതിഷേധിച്ച്‌ സംസ്ഥാനത്ത് ചൊവ്വാഴ്ച മോട്ടോര്‍ വ്യവസായ മേഖലയിലെ ട്രേഡ് യൂനിയനുകളും തൊഴിലുടമകളും സംയുക്ത പണിമുടക്ക് നടത്തും. രാവിലെ ആറുമുതല്‍ വൈകീട്ട് ആറുവരെയാണ് പണിമുടക്ക്.
കേന്ദ്ര സര്‍ക്കാര്‍ എക്സൈസ് നികുതി, അഡീഷനല്‍ എക്സൈസ്, സര്‍ചാര്‍ജ് തുടങ്ങിയവ കുത്തനെ ഉയര്‍ത്തിയതും പെട്രോളിയം കമ്ബനികള്‍ക്ക് കൊള്ളലാഭമുണ്ടാക്കാന്‍ അവസരമൊരുക്കിയതുമാണ് വിലക്കയറ്റത്തിന് പിന്നില്‍. വിലക്കയറ്റം പിന്‍വലിക്കാന്‍ കേന്ദ്ര സര്‍ക്കാര്‍ തയാറാകണമെന്നാവശ്യപ്പെട്ടാണ് പണിമുടക്ക്.
ചൊവ്വാഴ്ച നടക്കേണ്ട എസ്.എസ്.എല്‍.സി, പ്ലസ് ടു മോഡല്‍ പരീക്ഷകള്‍ മാര്‍ച്ച്‌ എട്ടിലേക്ക് മാറ്റി. ഇന്ധന വിലവര്‍ധനയില്‍ പ്രതിഷേധിച്ച്‌ നാളെ സംയുക്ത സമരസമിതിയുടെ വാഹന പണിമുടക്ക് നടത്തുന്നതിനാലാണ് പരീക്ഷ മാറ്റിയത്. മറ്റു തിയതികളിലെ പരീക്ഷകള്‍ക്ക് മാറ്റമില്ല.
എസ്.എസ്.എല്‍.സി, പ്ലസ്ടു മോഡല്‍ പരീക്ഷകള്‍ ഇന്നാണ് തുടങ്ങിയത്. പരീക്ഷ മാര്‍ച്ച്‌ അഞ്ചിന് അവസാനിക്കും. രാവിലെയും ഉച്ചക്ക് ശേഷവുമായാണ് പരീക്ഷ. മാര്‍ച്ച്‌ 17 മുതല്‍ 30 വരെ വരെയാണ് എസ്.എസ്.എല്‍.സി, പ്ലസ്ടു പൊതു പരീക്ഷകള്‍ നടക്കുന്നത്. പ്രത്യേക ക്രമീകരണങ്ങള്‍ സ്‌കൂളുകളില്‍ ഒരുക്കിയിട്ടുണ്ട്.
