kerala
'മുല്ലപ്പെരിയാര് വിഷയത്തില് സര്ക്കാര് നിഷ്ക്രിയം'; മന്ത്രി റോഷി അഗസ്റ്റിന്റെ പ്രസ്താവന പരിഹാസ്യമെന്നും വി ഡി സതീശന്
'മുല്ലപ്പെരിയാറില് മരം മുറിക്കാന് അനുമതി നല്കിയതും മേല്നോട്ട സമിതിയില് തമിഴ്നാടിന് അനുകൂലമായി തീരുമാനമെടുത്തതും സുപ്രീം കോടതിയില് കേരളത്തിന്റെ കേസ് ദുര്ബലമാക്കുന്ന തരത്തിലുള്ള നടപടികള് സ്വീകരിക്കുന്നതും രാത്രിയില് വെള്ളം തുറന്നു വിടുന്നതിനെ എതിര്ക്കാത്തതും ആരെ ഭയന്നിട്ടാണെന്ന് മുഖ്യമന്ത്രി വ്യക്തമാക്കണം. പ്രതിപക്ഷം ഉന്നയിക്കുന്ന ചോദ്യങ്ങള്ക്ക് മറുപടി നല്കാതെ ഒളിച്ചോടുന്ന മുഖ്യമന്ത്രി, ജനങ്ങളെ നേരിട്ടു ബാധിക്കുന്ന മുല്ലപ്പെരിയാര് വിഷയത്തിലെങ്കിലും തീരുമാനങ്ങളെടുക്കണം.', എന്നും വി ഡി സതീശന് കുറ്റപ്പെടുത്തി.
തമിഴ്നാട് ജലം തുറന്നുവിടുന്നത് വേദനാജനകമാണെന്ന ജലവിഭവ വകുപ്പ് മന്ത്രിയുടെ പ്രസ്താവന പരിഹാസ്യമാണെന്നും സതീശന് പറഞ്ഞു. വെള്ളം തുറന്നു വിടുന്നത് മുന്കൂട്ടി അറിയിക്കുമെന്നും രാത്രികാലങ്ങളില് ഷട്ടര് തുറക്കില്ലെന്നും കേരള, തമിഴ്നാട് പ്രതിനിധികള് അംഗമായുള്ള ഡാം മേല്നോട്ട സമിതിയില് ധാരണയുണ്ട്. എന്നാല് തുടര്ച്ചയായി രാത്രികാലങ്ങളില് തമിഴ്നാട് വെള്ളം തുറന്നുവിടുകയാണ്. അതിനെതിരെ പ്രതികരിക്കാനോ തമിഴ്നാട് മുഖ്യമന്ത്രിയുമായി സംസാരിക്കാനോ കേരള മുഖ്യമന്ത്രി ഇതുവരെ തയാറായിട്ടില്ലെന്നും പ്രതിപക്ഷ നേതാവ് കൂട്ടിച്ചേര്ത്തു.
