കോവിഡ്, സാമ്പത്തിക ബാധ്യത: ഹോട്ടൽ ഉടമ ജീവനൊടുക്കി; സങ്കടത്തോടെ ഇടുക്കി

പീരുമേട് ∙ കോവിഡ് കാരണമുണ്ടായ സാമ്പത്തിക ബാധ്യതയെ തുടർന്ന് ഹോട്ടൽ ഉടമ ജീവനൊടുക്കി. പീരുമേട് ജംക്‌ഷനിൽ നന്ദനം ഹോട്ടൽ നടത്തി വന്നിരുന്ന വിജയ് (38) ആണ് വീടിനുള്ളിൽ ജീവനൊടുക്കിയത്. ഭാര്യയും മക്കളും വീട്ടിലുള്ള സമയത്തു മുറിയിൽ കയറി കതകടച്ച ശേഷം തൂങ്ങി മരിക്കുകയായിരുന്നെന്നു പൊലീസ് പറഞ്ഞു.

കോവിഡ് ലോക്ഡൗണിൽ ഹോട്ടൽ അടച്ചുപൂട്ടിയ ശേഷം വിജയ് കടുത്ത സാമ്പത്തിക പ്രതിസന്ധിയിലായിരുന്നു. ധനകാര്യ സ്ഥാപനങ്ങളിൽ വലിയ ബാധ്യതയുണ്ടായിരുന്നെന്നും പൊലീസ് പറഞ്ഞു. കോവിഡിനെ തുടർന്നുണ്ടായ കടബാധ്യത കാരണം ഇടുക്കിയിൽ ആറാമത്തെ ആളാണ് ആത്മഹത്യ ചെയ്യുന്നത്.