സംസ്ഥാനത്ത് കോവിഡ് വാക്സിന് ഇന്ന് എത്തും; ആദ്യഘട്ടം കേരളത്തിൽ 4.35 ലക്ഷം ഡോസ്
കൊച്ചി: ആദ്യഘട്ട കൊവിഡ് വാക്സിൻ ഇന്ന് കേരളത്തിലെത്തും. വാക്സിനുമായുള്ള വിമാനം രാവിലെ 11.15ന് നെടുമ്പാശേരിയിലും വൈകിട്ട് ആറ് മണിക്ക് തിരുവനന്തപുരത്തുമെത്തും. സംസ്ഥാനത്തെ മൂന്ന് മേഖല കേന്ദ്രങ്ങളില് നിന്നാകും ജില്ലകളിലേക്ക് വാക്സിൻ എത്തിക്കുക.
കേരളത്തിന് 4.35 ലക്ഷം വയല് വാക്സിനാണ് ആദ്യഘട്ടം ലഭിക്കുക. 10 ഡോസ് അടങ്ങുന്ന ഒരു കുപ്പിയാണ് വയല്. 1100 ഡോസ് മാഹിയിൽ വിതരണം ചെയ്യാനുള്ളതാണ്. 16-നാണ് മുൻകൂട്ടി രജിസ്റ്റർ ചെയ്തിട്ടുള്ള ആരോഗ്യപ്രവർത്തകർക്ക് പ്രതിരോധമരുന്ന് നൽകുക.
covid 19,covid 19 vaccine,covid vaccine,first phase covid vaccine,കൊവിഡ് 19,കൊവിഡ് വാക്സീൻ,കൊവിഡ് വാക്സീൻ കേരളത്തിന്,വാക്സീൻ കേരളത്തിന്,vaccine
തിരുവനന്തപുരം, എറണാകുളം, കോഴിക്കോട് ജില്ലകളിലെ മേഖല വാക്സിന് സ്റ്റോറേജ് കേന്ദ്രങ്ങളിലേയ്ക്കാണ് ആദ്യം വാക്സിന് മാറ്റുക. കൊച്ചിയിലെത്തിക്കുന്ന 2,99,500 ഡോസ് വാക്സിനില് 1,19,500 ഡോസ് കോഴിക്കോട് മേഖലയ്ക്കായി റോഡ് മാര്ഗം കൊണ്ടു പോകും. മാഹിക്ക് നല്കാനുള്ള 1100 ഡോസ് വാക്സിന് കോഴിക്കോട് നിന്നാണ് കൊണ്ടുപോവുക. തിരുവനന്തപുരത്ത് വൈകീട്ട് ആറ് മണിയോടെ 1,34,000 ഡോസ് വാക്സിന് വിമാനത്തില് എത്തിക്കും.
തിരുവനന്തപുരത്ത് നിന്ന് ആലപ്പുഴ, കൊല്ലം, പത്തനംതിട്ട, തിരുവനന്തപുരം ജില്ലകളിലെ വാക്സിനേഷൻ കേന്ദ്രങ്ങളിലേക്കും കൊച്ചിയില് നിന്ന് എറണാകുളം, ഇടുക്കി, കോട്ടയം, പാലക്കാട്, തൃശൂര് ജില്ലകളിലെ വാക്സിനേഷൻ കേന്ദ്രങ്ങളിലേക്കും കോഴിക്കോട് സ്റ്റോറില് നിന്ന് കണ്ണൂര്, കോഴിക്കോട്, കാസര്കോട്, മലപ്പുറം, വയനാട് എന്നിവിടങ്ങളിലേക്കും വാക്സിൻ നല്കും.
എറണാകുളം ജില്ലയില് 12 , തിരുവനന്തപുരം, കോഴിക്കോട് ജില്ലകളില് 11 വീതം, ബാക്കി ജില്ലകളില് 9 വീതം അങ്ങനെ 133 കേന്ദ്രങ്ങളാണ് വാക്സിനേഷനായി ഒരുക്കിയിട്ടുള്ളത്. ഇവിടങ്ങളില് ഒരു ദിവസം 100 വീതം പേര്ക്ക് വാക്സിൻ നൽകും. വാക്സിന്റെ ലഭ്യത അനുസരിച്ച് ഓരോ ജില്ലകളിലും നൂറിലധികം കേന്ദ്രങ്ങൾ വരും ദിവസങ്ങളില് സജ്ജമാക്കും. നിലവില് സര്ക്കാര് സ്വകാര്യ മേഖലകളിലെ 359549 ആരോഗ്യ പ്രവര്ത്തകര്ക്കാണ് ആദ്യഘട്ടം വാക്സിൻ നൽകുക.
മറ്റന്നാളോടെ രാജ്യത്ത് എല്ലായിടത്തും വാക്സിൻ എത്തുമെന്ന് കേന്ദ്ര ആരോഗ്യമന്ത്രാലയം അറിയിച്ചിട്ടുണ്ട്. കേരളത്തിലേതടക്കം രാജ്യത്തെ പതിമൂന്ന് കേന്ദ്രങ്ങളിലേക്ക് അന്പത്തിയാറര ലക്ഷം ഡോസ് വാക്സിനാണ് അടിയന്തരമായി എത്തിക്കുന്നത്. കേന്ദ്രത്തിന്റെ അഭ്യര്ത്ഥന മാനിച്ച് ആദ്യ ആയിരം മില്യണ് ഡോസ് വാക്സീന് മാത്രമാകും 200 രൂപക്ക് നല്കുകയെന്നാണ് സെറം ഇന്സ്റ്റിറ്റ്യൂട്ട് വ്യക്തമാക്കുന്നത്.
ജനുവരി 16 മുതലാണ് രാജ്യത്ത് കോവിഡ് വാക്സിന് കുത്തിവെയ്പ്പ് ആരംഭിക്കുന്നത്. തുടക്കത്തില് 30 കോടി പേര്ക്ക് വാക്സിന് നല്കാനാണ് കേന്ദ്ര സര്ക്കാര് ലക്ഷ്യമിടുന്നത്. ആദ്യ ഘട്ടത്തില് മൂന്ന് കോടി കോവിഡ് മുന്നണി പോരാളികളായ ആരോഗ്യ പ്രവര്ത്തകര്ക്കാണ് വാക്സിന് നല്കുക. രണ്ടാംഘട്ടത്തില് 50 വയസിന് മുകളിലുള്ളവര്ക്ക് നല്കും.
ആദ്യഘട്ടത്തിൽ വാക്സിൻ വിതരണ ചെലവ് മുഴുവൻ കേന്ദ്രം വഹിക്കുമെന്ന് പ്രധാനമന്ത്രി അറിയിച്ചിരുന്നു. പതിനൊന്ന് കോടി ഡോസ് കൊവിഷീല്ഡ് വാക്സിനുള്ള പര്ച്ചേസ് ഓര്ഡറാണ് കേന്ദ്രം സെറം ഇന്സ്റ്റിറ്റ്യൂട്ടിന് നല്കിയിരിക്കുന്നത്.
