കൊവിഡ് വാക്സിൻ സ്വീകരിച്ചതിന് ശേഷമുണ്ടായ 11 മരണം; മരണത്തിൽ അന്വേഷണം വേണം: കേന്ദ്രത്തിന് കത്തയച്ച് ആരോ​ഗ്യ വിദ​ഗ്ധർ

കൊവിഡ് വാക്സിൻ സ്വീകരിച്ചതിന് ശേഷം ഇന്ത്യയിൽ പതിനൊന്ന് പേർ മരിച്ചുവെന്ന് റിപ്പോർട്ട്. ഈ മരണങ്ങളിൽ അന്വേഷണം വേണമെന്ന് കാണിച്ച് പൊതു ആരോ​ഗ്യ വിദ​ഗ്ധർ കേന്ദ്ര ആരോ​ഗ്യ മന്ത്രാലയത്തിന് കത്തയച്ചു.

പ്രമുഖ ആരോ​ഗ്യ വിദ​ഗ്ധരായ മാലിനി ഐസോല, എസ്പി കലന്ത്രി, ടി ജേക്കബ് എന്നിവരടക്കമുള്ള ആരോ​ഗ്യ വിദ​ഗ്ധരാണ് കേന്ദ്ര മന്ത്രാലയത്തിന് കത്തയച്ചത്.

ഈ പതിനൊന്ന് പേരും മരിച്ചതിന് കാരണം കൊവിഡ് വാക്സിനല്ലെന്ന് അധികൃതർ പറയുന്നുണ്ടെങ്കിലും അഡ്വേഴ്സ് ഇവന്റ്സ് ഫോളോയിം​ഗ് ഇമ്യുണൈസേഷന്റെ ജില്ല-സംസ്ഥാന-ദേശിയ റിപ്പോർട്ടുകളൊന്നും തന്നെ ഇതുവരെ പുറത്തുവിട്ടിട്ടില്ലെന്ന് വിദ​ഗ്ധർ ചൂണ്ടിക്കാട്ടുന്നു.

ഈ മരണങ്ങളെ കുറിച്ച് ആര് അന്വേഷിച്ചുവെന്നോ, എങ്ങനെയാണ് അന്വേഷണം നടത്തിയതെന്നോ ഒന്നും പരസ്യമാക്കിയിട്ടില്ല. അതുകൊണ്ട് തന്നെ ദേശിയ കമ്മിറ്റിക്ക് ഇത് അന്വേഷിക്കേണ്ട ഉത്തരവാദിത്തമുണ്ടെന്നും കത്തിൽ വ്യക്തമാക്കുന്നു.