'കോൺ​ഗ്രസിനെ തിരികെ എത്തിക്കുമെന്ന് സോണിയക്ക് ഉറപ്പ് നൽകി'; വിജയത്തിൽ വിതുമ്പി ഡി കെ ശിവകുമാർ

ബെം​ഗളൂരു: കർണാടകയിലെ കോൺ​ഗ്രസിന്റെ മഹാവിജയത്തിൽ വിതുമ്പി സംസ്ഥാന അദ്ധ്യക്ഷൻ ഡി കെ ശിവകുമാർ. കൂട്ടായ പ്രവർത്തനത്തിന്റെ വിജയമാണിത്. എന്തു വില കൊടുത്തും കർണാടകയിൽ കോൺ​ഗ്രസിനെ തിരികെ എത്തിക്കുമെന്ന് സോണിയ ​ഗാന്ധിക്കും, മല്ലികാർജുൻ ഖാർ​ഗെയ്ക്കും, പ്രിയങ്കയ്ക്കും, രാഹുലിനും ഞാൻ നൽകിയ ഉറപ്പായിരുന്നു. ബിജെപി തന്നെ തിഹാർ ജയിലിലടച്ചപ്പോൾ സോണിയ ​ഗാന്ധി സന്ദർശിക്കാൻ വന്നത് മറക്കാനാകില്ല. കർണാടകയിലെ ജനം ഞങ്ങളെ വിശ്വാസിച്ചുവെന്നും ഡി കെ ശിവകുമാർ പറഞ്ഞു.

സിദ്ധരാമയ്യ അടക്കമുളള സംസ്ഥാനത്തെ എല്ലാ നേതാക്കൾക്കും നന്ദിയുണ്ടെന്നും ഡി കെ ശിവകുമാർ പ്രതികരിച്ചു. നേതാക്കൾക്കാണ് ഈ വിജയത്തിന്റെ ക്രെഡിറ്റ്. ബൂത്ത് തലത്തിലുളള പ്രവർത്തകർ അടക്കം എല്ലാവർക്കും ഈ വിജയത്തിൽ പങ്കുണ്ടെന്നും ഡികെ ശിവകുമാർ പറഞ്ഞു. വികാരധീനനായിട്ടായിരുന്നു ഡി കെ ശിവകുമാറിന്റെ പ്രതികരണം.

പ്രതീക്ഷിച്ച വിജയമാണ് കർണാടകയിൽ കോൺ​ഗ്രസ് നേടിയതെന്ന് മുതിര്‍ന്ന നേതാവും മുന്‍ മുഖ്യമന്ത്രിയുമായ സിദ്ധരാമയ്യ പറഞ്ഞു. പ്രധാനമന്ത്രി നരേന്ദ്ര മോദി വന്നാല്‍ പോലും കര്‍ണാടകയില്‍ ഒന്നും സംഭവിക്കില്ലെന്ന് അന്ന് തന്നെ പറഞ്ഞിരുന്നു. അത് സംഭവിച്ചിരിക്കുന്നു എന്നും സിദ്ധരാമയ്യ പ്രതികരിച്ചു. കേവല ഭൂരിപക്ഷം മറികടന്ന സാഹചര്യത്തില്‍ കോണ്‍ഗ്രസ് എംഎല്‍എമാരുടെ യോഗം വിളിച്ചിട്ടുണ്ട്. ഞായറാഴ്ച്ച രാവിലെ ബെം​ഗളൂരുവിലാണ് യോ​ഗം.