പൊങ്കൽ: കേരളത്തിലെ ഈ ആറ് ജില്ലകളിൽ നാളെ അവധി, തിരുവനന്തപുരം നഗരത്തിൽ വെള്ളിയാഴ്‌ച അവധി

തിരുവനന്തപുരം: പൊങ്കൽ ആഘോഷങ്ങളുടെ ഭാഗമായി കേരളത്തിലെ നാല് ജില്ലകളിൽ സർക്കാർ അവധി. തിരുവനന്തപുരം, കൊല്ലം, പത്തനംതിട്ട, ഇടുക്കി, പാലക്കാട്, വയനാട് ജില്ലകളിലാണ് നാളെ (ജനുവരി 14 നാളെ) പ്രാദേശിക അവധി നൽകിയിരിക്കുന്നത്.

ബീമാപള്ളി ഉറൂസ് പ്രമാണിച്ച് തിരുവനന്തപുരം നഗരത്തിൽ വെള്ളിയാഴ്‌ച (ജനുവരി 15) അവധി പ്രഖ്യാപിച്ചു. ഓണത്തിന് സമാനമായ തമിഴ്‌നാട്ടിലെ ഏറ്റവും പ്രധാന ആഘോഷമാണ് പൊങ്കൽ. ഈ സാഹചര്യത്തിലാണ് തമിഴ്‌നാടുമായി അതിർത്തി പങ്കിടുന്ന ജില്ലകളിലും തമിഴ്‌നാട്ടിൽ നിന്നുള്ളവർ കൂടുതലായി താമസിക്കുന്ന ജില്ലകളിലും കേരള സർക്കാർ അവധി പ്രഖ്യാപിച്ചിരിക്കുന്നത്.

തിരുവനന്തപുരം, ഇടുക്കി, വയനാട് ജില്ലകളിൽ തമിഴ് നാട്ടിൽ നിന്നുള്ളവരുടെ സാന്നിധ്യം കൂടുതലാണ്. മുൻ വർഷങ്ങളിലും കേരളത്തിലെ വിവിധ ജില്ലകളിൽ പൊങ്കലിന് അവധി പ്രഖ്യാപിച്ചിരുന്നു.

കൊവിഡ്-19 ആശങ്ക തുടരുന്നതിനാൽ 15, 16, 17, തീയതികളിൽ കന്യാകുമാരി ജില്ലയിലെ വിനോദ സഞ്ചാരകേന്ദ്രങ്ങളിൽ സന്ദർശക വിലക്കേർപ്പെടുത്തി. ജില്ലയിലെ കടൽത്തീരങ്ങൾ ഉൾപ്പെടെയുള്ള മറ്റ് വിനോദ സഞ്ചാരകേന്ദ്രങ്ങൾക്ക് വിലക്ക് ബാധകമാണ്.