നെടുമ്പാശ്ശേരി:ഒരു കിലോയിലധികം ഹാഷിഷ് വിദേശത്തേക്ക് കടത്താൻ ശ്രമിച്ച യുവതി കൊച്ചി വിമാനത്താവളത്തിൽ പിടിയിൽ. തൃശ്ശൂർ വെങ്ങിണിശ്ശേരി താഴേക്കാട്ടിൽ വീട്ടിൽ രാമിയ (33) ആണ് പിടിയിലായത്.
ഇവരെ നെടുമ്പാശ്ശേരി പോലീസിന് കൈമാറുകയും അറസ്റ്റ് രേഖപ്പെടുത്തുകയും ചെയ്തു. പിടികൂടിയ ഹാഷിഷിന് അന്താരാഷ്ട്ര വിപണിയിൽ ഒരു കോടിയോളം രൂപ വില വരുമെന്ന് പോലീസ് പറഞ്ഞു. ഇവർ മുൻപും ഗൾഫിൽ പോയിട്ടുണ്ട്. അവസാനം പോയപ്പോൾ 10 ദിവസമാണ് ഗൾഫിൽ തങ്ങിയത്. മുമ്പും ഇവർ മയക്കുമരുന്ന് കടത്തിയിട്ടുണ്ടോ എന്നും ഇവർക്ക് ആരാണ് മയക്കുമരുന്ന് കൈമാറിയിരിക്കുന്നതെന്നുമുൾപ്പെ ടെയുള്ള കാര്യങ്ങൾ പോലീസ് അന്വേഷിക്കുന്നുണ്ട്.
സംഭവത്തെക്കുറിച്ച് വിശദമായ അന്വേഷണം നടത്തുമെന്ന് ജില്ലാ പോലീസ് മേധാവി കെ. കാർത്തിക് പറഞ്ഞു. കഴിഞ്ഞ ദിവസം നെടുമ്പാശ്ശേരി വിമാനത്താവള പരിസരങ്ങളിൽ പോലീസ് നടത്തിയ പരിശോധനയിൽ വിവിധ ആളുകളിൽനിന്നായി നാല് കിലോയോളം നിരോധിത പുകയില ഉത്പന്നങ്ങൾ പിടികൂടിയിരുന്നു.
