kerala
കേരളത്തില് ചൊവ്വാഴ്ച ഭാരത് ബന്ദില്ല; പകരം മറ്റ് സമരമാര്ഗങ്ങള്
തിരുവനന്തപുരം: കര്ഷക സംഘടനകള് രാജ്യവ്യാപകമായി ആഹ്വാനം ചെയ്ത ഭാരത് ബന്ദ് കേരളത്തില് ഉണ്ടാകില്ല. സംസ്ഥാനത്ത് തദ്ദേശ തെരഞ്ഞെടുപ്പിന്റെ ആദ്യഘട്ട വോട്ടെടുപ്പ് നടക്കുന്നതിനാലാണിത്. എന്നാല്, ബന്ദിന് പകരം മറ്റ് സമരമാര്ഗങ്ങള് ആലോചിക്കുമെന്ന് കേരള കര്ഷക സംഘം സംസ്ഥാന സെക്രട്ടറി കെ എന് ബാലഗോപാല് പറഞ്ഞു.
ഭാരത് ബന്ദില് നിന്ന് കേരളത്തെ ഒഴിവാക്കേണ്ടി വരുമെന്നും മറ്റ് മാര്ഗങ്ങളുമായി കര്ഷക കോണ്ഗ്രസ് മുന്നോട്ട് പോകുമെന്നും സംസ്ഥാന പ്രസിഡന്റ് ലാല് വര്ഗീസ് കല്പ്പകവാടി പറഞ്ഞു. സംസ്ഥാനത്തെ തദ്ദേശ തെരഞ്ഞെടുപ്പിന്റെ ആദ്യഘട്ടമായി അഞ്ചു ജില്ലകളില് ചൊവ്വാഴ്ചയാണ് വോട്ടെടുപ്പ് നടക്കുന്നത്. ഈ സാഹചര്യത്തില് ഭാരത് ബന്ദ് നടത്തുന്നത് ബുദ്ധിമുട്ടാകുന്നത് പരിഗണിച്ചാണ് പുതിയ സമരമാര്ഗങ്ങള് തേടുന്നത്.
വിവാദ കാര്ഷിക ബില് നിയമങ്ങള് കേന്ദ്ര സര്ക്കാര് പിന്വലിക്കാത്ത സാഹചര്യത്തിലാണ് ചൊവ്വാഴ്ച രാജ്യവ്യാപകമായി ബന്ദിന് കര്ഷക സംഘടനകള് ആഹ്വാനം ചെയ്തിരിക്കുന്നത്. പ്രതിഷേധത്തിന്റെ ഭാഗമായി രാജ്യമെമ്പാടും പ്രധാനമന്ത്രി നരേന്ദ്ര മോദിയുടെ കോലം കത്തിക്കുമെന്ന് കര്ഷകര് അറിയിച്ചു. മാത്രമല്ല, രാജ്യതലസ്ഥാനത്തേയ്ക്കുള്ള എല്ലാ റോഡുകളും തടയുമെന്നും ഡല്ഹി അതിര്ത്തികളില് പ്രതിഷേധിക്കുന്ന കര്ഷകര് ഭീഷണി ഉന്നയിച്ചു. രാജ്യത്തെ എല്ലാ ടോള് ഗേറ്റുകളും ഉപരോധിക്കുമെന്നും ടോള് പിരിവ് അനുവദിക്കില്ലെന്നും കര്ഷകര് അറിയിച്ചു.
