ചിലത് പറയണമെന്ന് ശിവശങ്കര് ; ജഡ്ജി അടുത്തേക്ക് വിളിച്ചു
രാവിലെ തന്നെ കോടതിയിലും ഇ.ഡി ഒാഫീസ് പരിസരത്തും കനത്ത പൊലീസ് കാവല് ഒരുക്കിയിരുന്നു. കോടതിയിലേക്ക് കൊണ്ടുപോകും മുമ്ബ് ഡോക്ടര്മാരുടെ സംഘം ഇ.ഡി ഒാഫീസിലെത്തി ശിവശങ്കറിനെ പരിശോധിച്ചു.
10.29 - ഇ.ഡിയുടെ കാര് കോടതി വളപ്പില്. കാമറകള് പൊതിഞ്ഞു. തിക്കിലും തിരക്കിനുമിടയിലൂടെ ശിവശങ്കര് പുറത്തേക്ക്.
പൊലീസ് ഒരുക്കിയ വഴിയിലൂടെ ലിഫ്റ്റില് കയറി. മാദ്ധ്യമ പ്രവര്ത്തര് ചോദ്യങ്ങളുമായി തിക്കിത്തിരക്കിയെങ്കിലും ഗൗരവത്തിലായിരുന്നു.
10.32 - ശിവശങ്കര് പ്രിന്സിപ്പല് സെഷന്സ് കോടതിയില്. അഭിഭാഷകന് എസ്. രാജീവ് ഉള്പ്പെടെ ഒപ്പമുണ്ടായിരുന്നു. ഇ.ഡിയുടെ അസിസ്റ്റന്റ് ഡയറക്ടര് പി. രാധാകൃഷ്ണന്, ഇ.ഡി സ്പെഷ്യല് പ്രോസിക്യൂട്ടര് അഡ്വ. ടി.എ. ഉണ്ണികൃഷ്ണന് തുടങ്ങിയവരും എത്തി.
10.40 - പ്രിന്സിപ്പല് സെഷന്സ് ജഡ്ജി കൗസര് എടപ്പഗത്ത് കോടതിയിലെത്തി. അവധി ദിനമായിട്ടും ഈ കേസ് പരിഗണിക്കാന് മാത്രമായിരുന്നു സിറ്റിംഗ്. പ്രതിക്കൂട്ടില് നിന്ന ശിവശങ്കര് ചിലകാര്യങ്ങള് കോടതിയോടു പറയാനുണ്ടെന്ന് അറിയിച്ചു. തന്റെ അടുത്തേക്ക് വരാന് ജഡ്ജി ആവശ്യപ്പെട്ടു. ഇ.ഡി പീഡിപ്പിക്കുന്നതായും വൈദ്യസഹായം നല്കിയില്ലെന്നും പരാതി ബോധിപ്പിച്ചു. ബന്ധുക്കളെ കാണാന് അനുവദിക്കണമെന്നും ആവശ്യപ്പെട്ടു. മെഡിക്കല് റിപ്പോര്ട്ടും ഹാജരാക്കി.
11.05 - വാദം പൂര്ത്തിയായതോടെ കോടതി കസ്റ്റഡി അനുവദിച്ചു. സഹോദരന് നാരായണന്, അനന്തരവന് അനന്തകൃഷ്ണന് എന്നിവരെ കാണാന് ശിവശങ്കറിന് അനുമതി നല്കി.
11. 25 - ശിവശങ്കറും അഭിഭാഷകരും കോടതിക്ക് പുറത്തേക്ക് വന്നു. ശിവശങ്കര് സഹോദരനോടും അനന്തരവനോടും സംസാരിച്ചു.
ഉച്ചക്ക് 1.05 -ശിവശങ്കറിനെ പുറത്തേക്ക് കൊണ്ടുവന്നു. മാദ്ധ്യമങ്ങളോടു സംസാരിച്ചില്ല. ഇ.ഡിയുടെ കാറില് എന്ഫോഴ്സ്മെന്റ് ഒാഫീസിലേക്ക്.
